Кина беше најголемиот светски купувач на течен природен гас минатата година
Најголемите кинески енергетски компании испраќаат течен гас во земјите од Европската унија за да ја надминат енергетската криза што го зафати Стариот континент по руската инвазија на Украина.
Блумберг, како што пренесува Business Insider, наведува дека пратките досега ги праќале големите компании Sinopec и PetroChina. Испораките од Кина доаѓаат откако Русија го прекина снабдувањето со гас во Европа преку Северен тек 1. Дури и малите компании како кинеската ENN Energy Holdings одлучија да го понудат својот гас во Европа, гледајќи можност за добар бизнис.
Новите количества гас што ги добиваме од Кина треба барем малку да ја олеснат ситуацијата, но треба да се напомене дека Европа, но и Азија се соочуваат со рекордни цени на природниот гас. Во меѓувреме Газпром објави дека има намера да продава гас на кинески компании кои ќе го платат во рубљи, но и во јуани.
Кина беше најголемиот светски купувач на течен природен гас минатата година. Сепак, строгите ограничувања во Пекинг поради КОВИД-19 доведоа до 20 проценти помала побарувачка оваа година.
Откако започна војната во Украина, Русија ја зголеми трговијата со Кина, што ја зголеми побарувачката за јуани. Русија сега е трет по големина пазар на јуани во светот.
